不可思議的真人真事之「升降機之謎」......

昨晚

上完瑜伽課再晚飯

返到屋企附近都已經十點幾 

大廈總共有三部升降機

呢個時間唔太多人搭

所以都唔需要等

其中一部自動開門

裡面係無人嘅

於是我地就入左去

當門關上之後

我感覺到有d唔妥

 

問:「你....聞唔聞到....有d味...?」 

答:「我都聞到....」 

「有無咁黑呀! 3部"lip" 偏偏入正呢部!

邊個咁無品...臨出去放低個謎語比人估!!!??」

 

 

 

 

 

 



不可思議的真人真事 之 『生命中不能承受的"燶"(nor)』....

是日
o係Nikon維修中心

有以下對話

 

 

顧客小姐：「唔該~我想問個MON花左...想知有無得換架？」

維修小姐：「唔好意思...呢D我地唔包架喎，妳自己要攞出去自己換架...」

顧客小姐：「o下!？」

維修小姐：「係呀! 呢d花左妳要自己攞出去換架...」

 

 

『生命中不能承受的"燶"』

(真係搣左好多次都搣唔起架MA....點知原來係有貼JACK?! 真係痴得好實喎)



不可思議的真人真事 之 照顧

晚上..在外用膳
隔鄰枱有幾位中年女士閒談，正在分享健康生活，談得有點唏噓...
接著，
我的餐點到了，專心用膳，再沒有留意她們的談話內容...
吃到一半，那唏噓的內容又忽然傳到我的耳中....

「唉~我地好彩有仔女照顧...又要返工..唔係邊惦吖」

 「咁又真係呀...阿x佢無仔女...有咩都要自己搞惦..有起事上黎真係...」

                           我聽到之後...都開始想起...自己...將來...

「所以我都到佢講...搵個人幫下手一個月帶佢去剪一次毛都好吖...」

                                             剪毛~!!!!!?

「咪係囉...我好彩..平日係個仔拖狗...唔係我真係好唔得閒呀」

不可思議的真人真事之護髮素

好似好耐無同大家講下d不可思議的真人真事喇......

話說lunch time
有2男1女同事正在閒談
唔知點樣講起洗髮

女同事:
係啦! 唔知點解好多男人都唔用護髮素
我老公都係咁
喂! 阿John, 你用唔用架?

John:
我唔用架喎

女同事:
o拿! 你又係啦!

女同事再望住Peter:
Peter~ 你呢..你又用唔用護髮素吖?

Peter:
大佬! 我點用呀

 

不可思議的真人真事 之九製陳皮

想起一個又係o係電台phone in 節目聽到嘅真人真事

外婆去完內地旅行
買左手信比大家

佢入左房o係個旅行袋攞左d手信出黎
細細聲同個女講

「呢包九製陳皮比阿孫仔食...不過等佢食完飯先比佢啦!」

於是到食飯時候
阿孫仔一直悶悶不樂咁嘅樣
直到食完飯
媽媽攞左外婆包手信比佢
但點都唔肯食

外婆: 「食啦...好好食架!」

佢仍然擰晒頭...死都唔肯食
仲想喊添


外婆: 「你做咩喊呀?!」
阿孫仔:「我頭先聽到你o係房同媽咪講...呢d係狗仔層皮黎嘅~!」

無煙日

http://www.tco.gov.hk/tc_chi/whatsnew/wntd_2012.html

‎
5月31日晚餐時，男女在談天....
女: 你知唔知5月31日除左係我生日...仲係咩日子呢?
男: ........係咩呀?
女:係世界無煙日呀...所以你今日唔可以食煙架~~
男:...無煙日...~咁咪玩唔到"13張"囉!
女:
 

不可思議的真人真事 之 make 個 copy...

前幾日...

聽到一個電台節目...

一位女聽眾講左一個自己與助手經歷嘅事...

話說佢有一日用部notebook睇左D文件之類嘅野，

跟住同助手講：「同我將呢份資料佢make 個 copy 吖!」

跟住...助手將佢部notebook 攞左去影印機度......

不可思議的真人真事 之 "神經水"

上個星期日路過旺角某藥房...見到佢↓

初時見到...好似有d問題又講唔出

列明”港幣”…可能係比內地同胞參考喎…

咁真係恕我孤陋寡聞…

我真係未聽過呢個叫法

究竟係有讀寫困讀?定係有心為難?

 

 

不可思議的真人真事(4)

正月十五年宵佳節

不如比個燈迷大家猜下好無呢?

話說年廿八o個晚路經柯士甸道

迎頭一對男女擦身而過

因為男子說話聲浪洪亮

所以就o係呢極速數十秒間
聽到以下嘅說話.....

『..........扯~我初時以為佢想我幫佢買嘅係d咩嘅手錶牌子.......
......你知唔知佢講咩呀? 佢話叫我幫佢買"約翰行路"呀....』


我相信我無估錯就係↓
http://www.extravaganzi.com/wp-content/uploads/2010/12/Johnnie-Walker-Blue-Label-Personalized-Bottle-1.jpg

不可思議的真人真事(3)

曾經...有2件不可思議的真人真事出現過
http://hk.myblog.yahoo.com/maria7e7e/article?mid=2621
http://hk.myblog.yahoo.com/maria7e7e/article?mid=4976

今晚..又有一個不可思議的真人真事三....

Mary:『講個祕密比你知吖，原來呀..全公司得 阿Betty無人工加呀..』
Peter:『...你點知架?』(其實Betty同Peter已經訴過苦)
Mary:『阿Lucy講我知架ma..』
Peter:『...咁...Lucy同你講有咩目的呢 ?』
Mary:『佢講呢個祕密我知就係叫我守囉..』
Peter:『...(-_-)...』

實在係一個極禪嘅道理，講個祕密比人知嘅目的就係要人守...我會好好記住..

不可思議的真人真事(2)

剛過去嘅星期六 , 我同二家姐閒談中 , 佢講左一件事 , 我好想同大家分享一下!

有一次 , 二家姐想check一個電話號碼 , 於是就打去PCCW到查詢 ...... 

二家姐 : 唔該~我想問下尖沙咀廣東道 D.K.N.Y. 嘅電話號碼

接線生 : 好! 請問小姐... 點串呢?

二家姐 : 哦~ 咁無野喇 , 唔該

不可思議的真人真事之"嚇"死異鄉

如果有個小朋友開始學寫字，
你第一個會教佢寫乜野字呢？

一、二、三、上、下.....??

全部我都唔會教
睇完我呢個 post 之後再話你知!

  

若干年前，
我接觸過一個異常頑劣嘅細路仔，簡稱頑童~
雖然只係見過一次咁多，但令我印象難忘!
之後，我耐唔中都會聽到有關佢嘅"事跡"...

最近
都應該有8歲嘅佢又有"杰"作！

話說頑童跟阿爺阿嫲參加左一個北京旅行團
仲有個年紀相若嘅表哥仔同行
有得坐飛機去旅行就梗係開心啦
一落機
頑童佢好大聲咁講左四個字

↓

↓

↓

↓

平

反

六

四

↑

↑

表哥仔亦非常"合作"咁齊齊叫~
當堂嚇到成團人"虛脫"咁濟

阿爺阿嫲都未趕得切反應
領隊哥哥已經飛奔去阻止頑童

H1N1 都要成團人隔離 7 日
我騐...呢一團坐底都要隔離 7 年 !

第二朝
行程去天安門廣場
頑童一落車
就比領隊哥哥捉左埋一邊
『o拿~我同你講，你唔好再亂噏野，如果你比人拉左去，我唔會話識你架下!』

  

好嘞~
我而家就話你知
我第一個教小朋友寫嘅字
就係
"死"
字
!

不可思議的真人真事(1)

星期日去左一間叫"牛車水"嘅餐廳食晚飯，有一個看似五十幾歲嘅男侍應同女收銀有以下一幕~

男侍應 : 『喂 ! 有無Panasonic 呀 ?』

跟住，個女收銀一聲都無答過佢，木無表情咁o係個櫃桶攞左盒 Panadol(必理痛)比佢

男侍應 : 『唔該!』

哇! 阿男侍應乜咁未來呀，如果你地邊個唔舒服，都不防試下啪兩粒Panasonic.......
好high架!