大澳『野獸派』

上個月同你地去瑞士嘅時候，
中途我偷偷地去左大澳一趟!
對上一次，原來已經係7、8年前嘅事......

 

大澳最有特色係咩野呢???
你地一定知道係建o係水上嘅棚屋啦，
而家仲多左乾左塘嘅棚屋添，
真係無奈!

 

 

棚屋雖然真係好有特色，
但始終唔夠呢件傑作咁吸引我，
簡直一見鍾情，令我念念不忘，
今次入去，順便解開我多年嘅疑團.....

唔該click番望望先→ http://hk.myblog.yahoo.com/maria7e7e/article?mid=790
望完喇o痳!
首先，我要更正番o個句野原來係:『馬王影相輸條鬚』至啱~

：

：

：
今次憑一點嘅記憶去搵番呢個位置，
不過已經睇唔番之前嘅傑作，
但無失望，
因為我見到換左另一件嘅作品，
睇下!!!!!

 

 

再行去旁邊嘅小路，
仲有其他....

雙生兒??

 

米奇老鼠斬老鼠呢個crossover真係有創意

有鎖鍊架，幾有立體感~

 

用人嘅方法同豬接生，仲要血淋淋.......

 

 

請大家留意下，
隻好邪惡嘅豬仔唔係恭喜緊發財架，
係"恭喜發射"呀~

 

睇完呢一連串充滿不安感嘅傑作，
有無發現係同生肖有關嘅呢?
我真係非常之好奇佢地嘅出處，
於是，我入去被"傑作"包圍住嘅東京士多了解一下!

入到去只見到一位老伯坐鎮，
為左容易d打開話題，就買左包檸檬茶幫襯下，
點知阿伯係一個主動嘅人(仲有少少口花添)
未開始入正題佢已經同你打開話題，
咁我就梗係即刻訪問佢啦!

 

 

我     :  『阿伯，請問你出面o個d畫係邊一位畫架 ?』

阿伯 : 『 ..............(佢o係右邊雜物堆裡面，拎左個 file 出黎比我睇)
   全部都係我畫嘅 !』

我接過 file ，見到裡面有好多張 colour print，全部都係呢類『野獸派』作品，差少少就有齊十二生肖!

我    :  『 原來係你畫架!!!  7、8年前黎大澳，我見到覺得好有趣，仲以為係有人整左之後無拆，留底o係度，今日見到換左另一款，好奇入黎問下!  咁點解會開始畫架??』

阿伯 : 『初時就畫黎玩下，見咁多人有興趣睇，又影相，咁我就每年都畫一次囉，叫個仔同我掛上去!』

我 :  『你畫左幾多年呀?有齊十二生肖?』

阿伯 : 『好多年喇~ 未齊，繼續畫到嘅話都會年年畫嘅』

唔好意思，各位!  我忘記阿伯畫左幾多幅，但無十幅都有八幅 !

 

阿伯仲話.......『有d人唔識，話我畫d野咸濕 !』

我  :『咁呢d都係表達手法，未必係咸濕嘅~』(p.s.一直我都係抱住呢個心，不過.......之後佢講左d 野，即刻對佢另眼相看)

............

阿伯手拿其中一張傑作(一個著住紅色bra嘅老虎頭女人身騎住隻老虎黎打)  : 『d人見到我畫個女人著到咁就話我咸濕，其實跟本唔係，你知唔知點解丫??』

我 : 『代表佢係個女人??』

阿伯 : 『唔係呀! 係可以快"菜" d!!』

我 : 『...........??』

後來，經阿伯點一點先明，佢嘅快"菜" = 快趣 ，
原來，我錯喇!!!!! 個意識真係好咸濕，你地自己意會一下嘞!!

 

 

不過，
我仍然覺得阿伯嘅傑作o個種不安感真係好正!!!!

本來
我打算用5分鐘嘅時間去解開疑團
最後
企o係度同阿伯傾左無半個鐘都有廿分鐘
老人家想傾耐d
就陪佢傾多陣啦~

o係呢段時間裡面
我已經知道阿伯佢幾多歲、讀書唔多、後生時做d咩工作、
工作令佢練到好多字、仲即場表演"閉目寫字"、
得到嘅服務獎、邊間棚屋係佢親手起.........

離開前
我問阿伯貴姓
佢又無答我
o係個衫袋度攞左張咭片比我

多謝呀~ 阿伯!
解開左我嘅疑團!

 

吖!各位單身嘅男士留意，阿伯仲為白雪公主徵婚架~
有興趣咪入去"相睇"下囉 !
無壞架!