瑞士非常突然之旅(第6篇)

執好行李未呀?要走喇!!

唔使驚喎~仲未返香港
我地要向東北部一個中古城鎮進發...
由Sargans(薩爾甘斯)坐2.5至3個小時嘅火車就可以到架喇!

呢度就係Stein am Rhein(萊茵河畔施泰因)
個名都幾"橋口"
:
:
由火車站大約行3分鐘，就會到呢個中古城鎮嘅入口，
而我地要入住嘅旅店亦都o係呢個位置，
各位真係唔好意思，跟我團就一定唔會有豪華住宿，
因為我最鍾意搵埋d房間唔多嘅小旅館，
有風味之餘仲可以同 d "掌櫃" Close d!
就好似今次呢一間 B&B...

大家真係點都估唔到o係地下有一間非常非常迷你嘅電影院，
基本上只係一間大房，鬼影都無隻，但又好周到咁喎!

 

入到去就要守下規矩嘞~

例如 :
下午5:00大門先至會開，所以o係呢個時間之前出街，
就要自己keep埋條大門匙，出去時仲要幫佢地鎖好門 !

唔準o係房裡面吸煙
但就可以o係每層樓嘅小露台吸飽佢

仲有仲有........

上房一定要除鞋
大家如果著住對襪行就要小心d喇!
之前我真係見到有個女人落樓梯時跣左o係度呀!

 

 

雖然呢度有好多規矩要守，但一入到房........
我就發現佢地好無規無矩~
就算你係同同性朋友一間房，
咁樣沖涼都真係......幾難受下!
噢! 我係話你個朋友呀~

 

 

Stein am Rhein(萊茵河畔施泰因)呢個名只係一個譯音
其實真正解作『萊茵河上的寶石』
一提萊茵河，多數只會想到德國，
但係萊茵河最靚嘅一段居然o係瑞士，真係偏心..
而呢個城鎮就係其中一個幸運兒嘞~

 

 

由於好接近德國，
所以呢度嘅屋仔都受到影響，
好有德國嘅味道!

 

 

剩係o係對面岸睇唔夠架，
等我帶你地入城感受下中古時代啦!!
行囉~

 

大家停一停先~
旅遊局介紹呢個市政廳廣場係瑞士最靚嘅廣場，
通常咁樣講，我都會有d保留，因為有好多地方都令我有d失望!
不過，今次呢個市政廳廣場都真係幾靚，
你地可以o係露天Cafe叫杯 Cappuccino慢慢嘆

順便欣賞下周圍嘅建築
嘆夠話我知，先再繼續行.....

 

發唔發現呢度嘅屋有咩特色??
係啦係啦~
就係有好多壁畫同凸窗

 

 

 

呢間就係St.George Abbey (聖左治本篤修道院)
係瑞士德語區保存得最完整嘅中古修道院，
裡面仲有個博物館，
不過，我無乜興趣，所以，連你地都唔可以有興趣....
無得睇!

 

 

Hey~又有凸窗喇!!
不過呢個有d唔同，
我伸高對手都掂到，証明佢係特別矮，
有無"高人"o係度?小心撞頭呀 ~
o依~仲有個牌寫左d野喎!! 睇睇有乜典故先.....

 

o下!!!! 德文黎嘅?????
德文人團友，如果你無離隊，唔該幫幫手丫~
我真係好想知講d乜架!

 

除左凸窗之外，
我發現呢度仲有兩樣野係好特別，

過黎啦 !
嗱~就係呢度嘞 !

第一樣就係店舖招牌，
統一得黎又好有個性，一睇就知間舖係賣D乜野!

 

 

 

第二樣就係...
我發現呢度好多門外面嘅地下，都有舊鐵，
仲有好多唔同花款添!

 

 

我騐過係咪以前d人要入去人地間屋，用黎暫時綁住隻馬o係度!
但係，又唔係好似喎!

為左解開疑團，
頭先，我入左一間舖頭去問個老闆，
佢話呢樣野已經有過百年歷史，
有d都比人拆左，但有人同佢一樣，仍然保留住!
你地想唔想估下有乜用呢??

算嘞~
大家企定，我做比你地睇睇~

 

仲未知牙?
o依~ 呢位團友，你隻鞋好似踩到 "污漕野"喎?!
過黎 "刮刮"佢~